Նորություններ

Անցկացվեց 3-րդ Կովկասյան մաթեմատիկական միջազգային օլիմպիադան

Ռուսաստանի Դաշնության Ադիգեայի Հանրապետության Մայկոպ քաղաքում 2018թ. մարտի 15-ից 20-ը տեղի ունեցավ 3-րդ Կովկասյան մաթեմատիկական միջազգային օլիմպիադան: Օլիմպիադան կազմակերպել էին Ադիգեայի Հանրապետության կրթության և գիտության նախարարությունը և Ադիգեայի պետական համալսարանը:
Օլիմպիադային մասնակցում էին շուրջ 100 մաթեմատիկոս Հայաստանից, Աբխազիայից, Ադիգեայից, Աստրախանից, Բուլղարիայից, Վոլգոգրադից, Դաղստանից, Ինգուշեթիայից, Կաբարդինո-Բալգարիայից, Կալմիկիայից, Կարաչայ-Չերքեզիայից, Կրասնոդարի երկրամասից, Ղրիմից, Սևաստոպոլից, Հյուսիսային Օսեթիայից, Ռոստովի տարածաշրջանից, Ստավրոպոլի երկրամասից, Չեչնիայից և Հարավային Օսեթիայից:
Հայաստանի Հանրապետությունը ներկայացնում էին ֆիզմաթ դպրոցի 10-րդ դասարանի աշակերտներ Կարեն Բաղդասարյանը, Տիգրան Չթչյանը, Էլեն Պետիկյանը և Վաչագան Դիլանյանը փոխտնօրեն Գևորգ Թամարյանի ղեկավարությամբ: Հայաստանի թիմը Մայկոպից Երևան վերադարձավ 3-րդ կարգի երկու դիպլոմով /Տ.Չթչյան, Վ. Դիլանյան/ և մեկ գովասանագրով /Կ. Բաղդասարյան/:
Օլիմպիադայի մասին առավել մանրամասն տես այս հղումով`
http://cmo.adygmath.ru/

Անցկացվեց «Ռոսատոմ» կորպորացիայի օլիմպիադաների եզրափակիչ փուլերը

Ս.թ. մարտի 10-ին ժամը 10:00-ին ՀԱՊՀ Երևանի ավագ դպրոցում «Ռոսատոմ» կորպորացիայի հովանու ներքո անցկացվեցին ֆիզիկա և մաթեմատիկա առարկաների օլիմպիադաների եզրափակիչ փուլերը, որին իրավունք էին ստացել մասնակցելու ՀԱՊՀ ավագ դպրոցի, ֆիզմաթ դպրոցի, Գյումրու ֆոտոն վարժարանի և Վանաձորի Էվրիկա վարժարանի թվով 36 աշակերտներ (մասնակցեցին 32-ը, 13-ը՝ մաթեմատիկա, 19-ը՝ ֆիզիկա):
Օլիմպիադայի կազմակերպման և անցկացման աշխատանքներին մասնակցեց Մոսկվայի ազգային միջուկայի հետազոտական համալսարանի (ՄԻՖԻ) ներկայացուցիչ, տեխնիկական գիտությունների թեկնածու, միջուկային ֆիզիկայի և տեխնոլոգիաների ինստիտուտի դոցենտ Յուրի Մասլովը:
Եզրափակիչ փուլի արդյունքները կհրապարակվեն 2018թ. ապրիլի սկզբին:
ՀԱՊՀ-ի ա/դ-ի տնօրեն Ա․Առաքելյան

2018 թ. առաջին հաջողությունները դպրոցականների միջազգային օլիմպիադայում

2018թ. հունվարի 10-ից 16-ը Ղազախստանի Ալմաթի քաղաքում տեղի ունեցավ Ժաուտիկովյան միջազգային 14-րդ օլիմպիադան:
Հայաստանի Հանրապետությունից այդ օլիմպիադային մասնակցում էին 18 դպրոցականներ՝ 9-ական Ա.Շահինյանի անվան ֆիզմաթ հատուկ դպրոցից և Քվանտ վարժարանից:
Այս տարի օլիմպիադային մասնակցում էին 15 պետությունների 68 թիմեր՝ ավելի քան 450 աշակերտներով:
Հայաստանի երկու թիմերը միասին արժանացան
7 մեդալի՝
2 ոսկի
և 5 բրոնզ:
Ֆիզմաթ դպրոցի թիմից մեդալների են արժանացել՝
- Գևորգյան Դավիթ - ֆիզիկա՝ ոսկե մեդալ,
- Մաղաքյան Գագիկ - մաթեմատիկա՝ ոսկե մեդալ,
- Մարտիրոսյան Վահան - մաթեմատիկա՝ բրոնզե մեդալ,
- Կարագուլյան Վահե - մաթեմատիկա՝ բրոնզե մեդալ,
- Սարգսյան Էմմա - ֆիզիկա՝ բրոնզե մեդալ:
Քվանտ վարժարանից մեդալների են արժանացել՝
- Կարալյան Ալեքսանդր - մաթեմատիկա՝ բրոնզե մեդալ,
- Անդրեասյան Սամվել - ինֆորմատիկա ՝ բրոնզե մեդալ:
Որպես թիմերի ղեկավարներ Ալմաթի էին մեկնել ֆիզմաթ դպրոցի մաթեմատիկայի ուսուցիչ Տիգրան Սարդարյանը և Քվանտ վարժարանի ֆիզիկայի ուսուցիչ Գրիգոր Աղաբաբյանը:

Ֆիզմաթ դպրոցի աշակերտների հերթական հաջողությունը

2017թ․ նոյեմբերի 24-ից դեկտեմբերի 2-ը- Բելոռուսի Հանրապեության Վիտեբսկի մարզի «Մարգարիտ» առողջարանային համալիրում անցկացվեց Փորձարարական ֆիզիկայի 5-րդ միջազգային օլիմպիադան, որին մասնակցեցին 6 պետությունների 22 քաղաքների 400-ից ավելի 9-12-րդ դասարանների աշակերտներ։ Նմանատիպ օլիմպիադաների անցկացման նպատակն է բացահայտել, աջակցել և խրախուսել մասնակիցներին՝ մասնագիտական կարողությունների զարգացման գործում։
Օլիմպիադային մասնակցեց նաև Հայաստանի թիմը, որում ընդգրկված էին Ա․Շահինյանի անվան ֆիզմաթ դպրոցի 12-րդ դասարանի աշակերտներ Դավիթ Գևորգյանն ու Վրեժ Առաքելյանը, 11-րդ դասարանի աշակերտներ Քրիստինե Գրիգորյանը ու Դավիթ Զոհրաբյանը։ Թիմը ղեկավարում էր ֆիզիկայի օլիմպիական խմբակի ուսուցիչ Գագիկ Գրիգորյանը։
Ֆիզմաթ դպրոցի թիմը հաջող հանդես եկավ ու արժանացավ մեկական
արծաթե /Դավիթ Գևորգյան/ և բրոնզե /Քրիստինե Գրիգորյան/ մեդալների։
Լրացուցիչ տեղեկացնենք, որ Փորձարարական ֆիզիկայի 5-րդ միջազգային օլիմպիադայի ամբողջական արդյունքներն առաջիկայում կտեղադրվեն
www.iepho.com կայքում։

Միջվարժարանային օլիմպիադա քիմիա և կենսաբանություն առարկաներից

2017 թ. նոյեմբերի 18-ին ՀՀ ԿԳՆ “Վանաձորի մաթեմատիկայի և բնագիտական առարկաների խորացված ուսուցմամբ հատուկ դպրոց” ՊՈԱԿ-ում /”Էվրիկա”/ կազմակերպվեց միջվարժարանային հանրապետական օլիմպիադա “Քիմիա” և ”Կենսաբանություն” առարկաներից:
Հանրապետության 9-12-րդ դասարանների 9 դպրոցի 121 աշակերտներ հյուրընկալվեցին “Էվրիկա” դպրոցում: Oլիմպիադային մասնակցեցին 5 դպրոց Վանաձորից /”Էվրիկա” հատուկ դպրոցը, թ. 5, թ.10, թ.11 ավագ դպրոցները, ՎՊՀ-ի հենակետային վարժարանը/, Երևանից 3 դպրոց /“Քվանտ” վարժարանը, Ա.Շահինյանի անվան ֆիզմաթ դպրոցը, թ.195 ավագ դպրոցը/, Գյումրիի “Ֆոտոն” վարժարանը: “Քիմիա” առարկայից ՝ մասնակցեց 47 աշակերտ, “Կենսաբանություն”-ից՝ 74 աշակերտ, որոշ աշակերտներ իրենց ուժերը փորձեցին երկու առարկաներից:
Օլիմպիադայի առաջադրանքների կազմման և ստուգման աշխատանքներին մասնակցել են նաև “Էվրիկա” դպրոցի միջազգային օլիմպիադաների մեդալակիր շրջանավարտներ Համլետ Խաչատրյանը, Սպարտակ Սաղյանը և Գուրգեն Սարգսյանը:
Օլիմպիադային մասնակիցների ողջունեց և հաջողություն մաղթեց “Էվրիկա” դպրոցի տնօրեն Ա.Ծատուրյանը: Բոլոր մասնակից դպրոցները ստացան մասնակցության շնորհակալագրեր: Օլիմպիադայի արդյունքները կհրապարակվեն առաջիկա օրերին:
Օլիմպիադայի առաջադրանքները, պատասխանները և արդյունքները տես կից PDF ֆայլերում։

Դպրոցականների Հայաստանի 5 թիմեր ինֆորմատիկայի եզրափակիչ փուլում

2017 թ․ նոյեմբերի 5-ին անցկացված ինֆորմատիկայի Համառուսաստայան 18-րդ թիմային բաց օլիմպիադայում դպրոցականների Հայաստանի 5 թիմեր հնարավորություն ստացան մասնակցելու եզրափակիչ փուլին: Հարավային տարածաշրջանի համար անցողիկ շեմ էր սահմանվել 4 ճիշտ լուծված առաջադրանքները: Այն կարողացել են հաղթահարել հետևյալ թիմերը՝
- Ֆիզմաթ N:1 (Մարտիրոսյան Վահան, Մաղաքյան Գագիկ, Գևորգյան Արտյոմ),
- Քվանտ N:1 (Ադամյան Ալեն, Վարդանյան Վարդան, Հովսեփյան Մկրտիչ),
- Ֆիզմաթ N:3 (Բոզոյան Դավիթ, Սաղաթելյան Հակոբ, Հովհաննիսյան Սեպուհ),
- Ֆիզմաթ և Քվանտ (Անդրեասյան Սամվել, Աբելյան Ալեքսանդր, Բեգլարյան Նարեկ),
- Ֆիզմաթ N:2 (Հայրապետյան Վրեժ, Գրիգորյան Գրիգոր, Մալխասյան Արսեն):
Տես հղումները՝

http://neerc.ifmo.ru/school/information/index.html
http://neerc.ifmo.ru/school/archive/2017-2018/ru-olymp-team-internet-2017-standings-south.html
Լրացուցիչ տեղեկացնենք, որ եզրափակիչ փուլը կանցկացվի ս․թ․ դեկտեմբերի 9-10-ը Թբիլիսիում։

2017 թ․ նոյեմբերի 5-ին ժամը 13:00-ին դպրոցականների Հայաստանի 15 թիմեր /յուրաքանչյուրում 3-ական աշակերտ/ մասնակցեցին ինֆորմատիկայի Համառուսաստայան 18-րդ թիմային բաց օլիմպիադայի նախնական ընտրական փուլին: Հայաստանի թիմերը ներկայացնում էին Ա․Շահինյանի անվան ֆիզմաթ հատուկ դպրոցը /6 թիմ/, ֆիզմաթ և «Քվանտ» /1 միացալ թիմ/, «Քվանտ» վարժարանը /2 թիմ/, ՀԱՊՀ-ի ավագ դպրոցը /4 թիմ/, ԱՅԲ ավագ դպրոց /1 թիմ/, Վանաձորի «Էվրիկա» վարժարանը /1 թիմ/:
Համառուսաստայան բաց օլիմպիադայում Հայաստանի թիմերն ընդգրկված են հարավային տարածաշրջանի մեջ, որում հանդես են գալիս նաև Ուկրաինայի, Վրաստանի և Ադրբեջանի դպրոցականների թիմերը։ Նախնական ընտրական փուլի արդյունքներով անցումային շեմը հաղթահարած թիմերը հնարավորություն կունենան ս․թ․ դեկտեմբերի 9-ից 10-ը Թբիլիսիում մասնակցելու եզրափակիչ փուլին։
Օլիմպիադայի ընթացքին կրելի է հետևել հետևյալ հղումով՝
http://neerc.ifmo.ru/school/russia-team/index.html
Կից ներկայացնում ենք Հայաստանի թիմերի կազմերը և օլիմպիդայի առաջադրանքները PDF ֆայլերով։

Միջվարժարանային հանրապետական օլիմպիադա Գյումրու ՖՈՏՈՆ վարժարանում

2017 թ. նոյեմբերի 1-ին Գյումրու Ֆոտոն վարժարանում անցկացվեց միջվարժարանային հանրապետական օլիմպիադա մաթեմատիկա և ֆիզիկա առարկաներից։ Օլիմպիադաներին մասնակցեցին թվով 167 աշակերտներ /113-ը՝ մաթեմատիկայից և 54-ը՝ ֆիզիկայից/ Երևանի Ա․Շահինյանի անվան ֆիզմաթ հատուկ դպրոցից և ՀԱՊՀ-ի ավագ դպրոցից, Գյումրու Ֆոտոն վարժարանից, թիվ 37 ավագ դպրոցից, Ակադեմիական վարժարանից, ՀԱՊՀ-ի ավագ դպրոցի Գյումրու մասնաճյուղից, Վանաձորի Էվրիկա վարժարանից, ՀՊՏՀ-ի Գյումրու մասնաճյուղի ավագ դպրոցից։
Ողջունելով մասնակիցներին և հյուրերին Ֆոտոն վարժարանի տնօրեն պարոն Մ․Մովսիսյանը բոլորին մաղթեց հաջողություն ու հույս հայտնեց, որ այն կլինի շարունակական և կնպաստի աշակերտների ու կրթoջախների միջև սերտ համագործակցությանը։ Տնօրենը մասնակից դպրոցներին հանձնեց շնորհակալագրեր օլիմպիադայի հրավերն ընդունելու և նրան ակտիվ մասնակցության համար։
Միջվարժարանային օլիմպիադայի կազմակերպիչների որոշմամբ Գրիգոր Բաղդասարյանի անվան 2017թ․-ի մրցանակին (50-ական դոլարին համարժեք դրամ) արժանացան Գյումրու Ֆոտոն վարժարանի 12-րդ դասարանի աշակերտ
Նարեկ Պետրոսյանը և Վանաձորի Էվրիկա վարժարանի 10-րդ դասարանի աշակերտ Տիգրան Նալբանդյանը։
Օլիմպիադայի ընթացքը լուսաբանվեց տեղական «Շանթ», «Ցայգ» և «Շիրակ» հեռուստաընկերությունների կողմից։
Օլիմպիադաների առաջադրանքները և պատասխանները տես կից PDF ֆայլերում։

«Ռոսատոմի» կորպորացիայի հովանու ներքո անցկացվեցին օլիմպիադաներ ֆիզիկա և մաթեմատիկա առարկաներից

Ս․թ․ 2017 թ. հոկտեմբերի 28-ին «Ռոսատոմի» կորպորացիայի հովանու ներքո ՀԱՊՀ-ի ավագ դպրոցում անցկացվեցին ֆիզիկա և մաթեմատիկա առարկաների օլիմպիադաների ընտրական փուլերը։ Օլիմպիադաներին մասնակցեցին թվով 83 աշակերտ /41-ը ֆիզիկայից և 42-ը մաթեմատիկայից/, որոնք ներկայացնում էին հանրապետության հինգ դպրոցներ՝ Ա․Շահինյանի անվան ֆիզմաթ հատուկ դպրոցը, Քվանտ վարժարանը, ՀԱՊՀ-ի ավագ դպրոցը, ք․Գյումրու Ֆոտոն և ք․Վանաձորի Էվրիկա վարժարանները։
Կազմակերպիչների տեղեկացմամբ ընտրական փուլերի արդյունքները կամփոփվեն մինչև ս․թ․ դեկտեմբերի 10-ը։ Անցողիկ շեմը հաղթահարաց աշակերտները հնարավորություն կստանան մասնակցելու 2018 թ․ մարտին անցկացվելիք օլիմպիադաների եզրափակիչ փուլերին։

Կից ֆայլեր՝ ՄԱՍՆԱԿՑՈՒԹՅԱՆ ՀՐԱՎԵՐԸ և ՄԱՄԼՈ ՀԱՂՈՐԴԱԳՐՈՒԹՅՈՒՆԸ։

Ֆիզմաթ դպրոցի 2017-2018 ուստարվա ընդունելություն

ՈՒՇԱԴՐՈՒԹՅՈՒՆ։ ՀՀ ԿԳ նախարարի հրամանով ֆիզմաթ դպրոցում բացվել է երրորդ 7-րդ դասարանը, որում ընդունվել են 12,5-ից մինչև 13,5 միավոր ստացած դիմորդները:
ԵՊՀ-ին առընթեր Ա․Շահինյանի անվան ֆիզիկամաթեմատիկական հատուկ դպրոցի 2017-2018 ուստարվա ընդունելություն:
7, 8 և 10-րդ դասարանների 1-ին և 2-րդ փուլերի առաջադրանքները, պատասխանները, արդյունքները և դպրոց ընդունած դիմորդների ցուցակները։
Ֆիզմաթ դպրոց ընդունած 7-րդ և 8-րդ դասարանների դիմորդներին տեղափոխման թերթիկ կտրամադրվի ֆիզմաթ դպրոցում օգոստոսի 18-ից:
Անձնական գործերը ներկայացնել օգոստոսի 21-ից 26-ը ներառյալ:
Մինչև օգոստոսի 29-ը անձնական գործը չներկայացրած աշակերտը զրկվում է ֆիզմաթ դպրոց ընդունվելուց:
ՇՆՈՐՀԱՎՈՐՈՒՄ ԵՆՔ ՖԻԶՄԱԹ ԴՊՐՈՑ ԸՆԴՈՒՆՎԱԾ ԲՈԼՈՐ ԴԻՄՈՐԴՆԵՐԻՆ։

Պարգևներ ստացան առարկայական օլիմպիադաների հաղթողները

ՀՀ կրթության և գիտության նախարարի պաշտոնակատար Լևոն Մկրտչյանը ս․թ․ մայիսի 24-ին պարգևատրեց 2016-17 ուսումնական տարվա դպրոցական առարկայական օլիմպիադաների առաջին կարգի դիպլոմակիր աշակերտներին:
Նշենք, որ 2016-2017 ուսումնական տարվա դպրոցականների առարկայական օլիմպիադաներին մասնակցել է շուրջ 47500 սովորող: Դպրոցական օլիմպիադաները կազմակերպվում են 16 առարկայից, որոնց հանրապետական փուլին մասնակցել է շուրջ 1700 աշակերտ: Առաջին կարգի դիպլոմների է արժանացել 62, երկրորդ կարգի դիպլոմի` 120, երրորդ կարգի` 156 և գովասանագրերի՝ 219 աշակերտ:

Pages