Նորություններ

Թվային տվյալներ դպրոցականների առարկայական օլիմպիադաներից - 2019

Հարգելի գործընկերներ,
Ավարտվեցին 2018-2019 ուսումնական տարվա դպրոցականների առարկայական օլիմպիադաները։
Ստորև ներկայացնում ենք օլիմպիադաների թվային տվյալները /տես կից PDF ֆայլերը/։
1. Դպրոցական փուլ․․․
2. Մարզային փուլ․․․
3. Հանրապետական փուլ․․․
Ձեզ հետաքրքրող այլ հարցերի մասին կարող եք լրացուցիչ տեղեկանալ գրելով մեր էլ․փոստի հասցեին՝
info@olymp.am :
Հարգանքով՝
Օլիմպիադաների կազմկոմիտե

2 արծաթե և 3 բրոնզե մեդալներ Կովկասյան 4-րդ մաթեմատիկական օլիմպիադայում

2019 թ․-ի մարտի 15-20-ը Ռուսաստանի Դաշնության Ադիգեյա հանրապետության Մայկոպ քաղաքում անցկացվեց Կովկասյան 4-րդ մաթեմատիկական օլիմպիադան, որին Հայաստանից մասնակցեցին Ա․Շահինյանի անվան ֆիզմաթ հատուկ դպրոցի 5 աշակերտներ։
Օլիմպիադայում մասնակցել են 140-ից ավելի աշակերտներ ՌԴ հարավային 15 շրջաններից և 10 օտարերկրա պետություններից։ Ֆիզմաթ դպրոցի թիմը հանդես եկավ պատանեկան լիգայում և արժանացավ 2 արծաթե (Բաբասյան Էրիկ – 10-րդ դասարան, Հովհաննիսյան Վահագն – 9 -րդ դասարան) և 3 բրոնզե (Մաթևոսյան Համլետ - 10-րդ դասարան, Ասատրյան Վահրամ - 9-րդ դասարան, Համբարձումյան Ռուբեն - 9-րդ դասարան) մեդալների:
Օլիմպիադայի անցկացման ժամանակ աշակերտները հնարավորություն են ստացել մասնակցելու տարբեր կրթական և մշակութային միջոցառումների, լսել հայտնի մաթեմատիկոսների սեմինարներ, այցելել տեսարժան վայրեր։
Հայաստանյան թիմը ղեկավարում էր ֆիզմաթ դպրոցի մաթեմատիկայի ուսուցիչ Սուրեն Գրիգորյանը։
Առավել մանրամասն ծանոթացեք Կովկասյան 4-րդ մաթեմատիկական օլիմպիադայի պաշտոնական կայքից հետևյալ հղումով՝
http://cmo.adygmath.ru/ru

Անցկացվեց Մ․Վ․Լոմոնոսովի անվան մրցույթի եզրափակիչ փուլը

2019 թ․-ի մարտի 9-ին Երևանում ռուսական գիտության և մշակույթի կենտրոն /ՌԳՄԿ/ անցկացվեց Մ․Վ․Լոմոնոսովի անվան մրցույթի եզրափակիչ փուլը, որին մասնակցելու իրավունք ունեցող 11-12-րդ դասարանների 31 աշակերտներից մասնակցեցին 24-ը /Ֆիզմաթ դպրքց - 8, Քվանտ վարժարան - 3, Այբ դպրոց - 1, ՀԱՊՀ ա/դ - 5, Հերացի ա/դ - 4, Վանաձորի Էվրիկա վարժարան - 3/։ Մրցույթն անցկացնելու նպատակով Երևան էր ժամանել Ռուսաստանի ներկայացուցիչ Արման Տուգանբաևը, ով աշակերտներին ծանոթացրեց եզրափակիչ մրցույթին բարձր արդյունքներ ցույց տալու դեպքում այն առանձնահատկությունները և արտոնություններին, որոնք կստանան աշակերտները ռուսաստանյան որոշ ԲՈՒՀ-եր դիմելու դեպքում։ 5 ժամ տևողությամբ մրցույթում աշակերտները իրենց ընտրությամբ կատարեցին առաջադրանքներ մաթեմատիկա, ֆիզիկա, կենսաբանություն, քիմիա և ոճաբանություն առարկաներից։
Հիշեցնենք, որ 2018 թ․-ի
սեպտեմբերի 30-ին Երևանի Ա․Շահինյանի անվան ֆիզմաթ հատուկ դպրոցում անց էր կացվել Մ․Վ․Լոմոնոսովի անվան մրցույթի առաջին փուլը, որին մասնակցել էին 191 աշակերտներ հանրապետության մի շարք դպրոցներից։ Առաջին փուլի արդյունքների ամփոփման արդյունքում մեր աշակերտները արժանացել են 44 դիպլոմների։
Մ․Վ․Լոմոնոսովի անվան մրցույթի եզրափակիչ փուլի անցկացմանը աջակցեց ՌԳՄԿ-ի ներկայացուցիչ Աննա Մարգարյանը։
Տես Լոմոնոսովի անվան մրցույթի պաշտոնական կայքը․․․
Դավիթ Մինասյան,
Ա․Շահինյանի անվան ֆիզմաթ հատուկ դպրոց,
ՏՏ կոորդինատոր-պատասխանատու

ՀՀ ԿԳՆ 1738 Ա/շ հրաման 27.12.2018թ․

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԴՊՐՈՑԱԿԱՆՆԵՐԻ ԱՌԱՐԿԱՅԱԿԱՆ ՕԼԻՄՊԻԱԴԱՅԻ 2018-2019 ՈՒՍՈՒՄՆԱԿԱՆ ՏԱՐՎԱ ՀԱՆՐԱՊԵՏԱԿԱՆ ԱՌԱՐԿԱՅԱԿԱՆ ՀԱՆՁՆԱԺՈՂՈՎՆԵՐԻ
ՆԱԽԱԳԱՀՆԵՐԻ ԿԱԶՄԸ ՀԱՍՏԱՏԵԼՈՒ ՄԱՍԻՆ 27.12.2018թ․ ԿԳՆ 1738 Ա/շ հրամանը

ՀՀ ԿԳՆ 1689 Ա/շ հրաման 18.12.2018թ․

ՀՀ կրթության և գիտության նախարարի 2018 թվականի դեկտեմբերի 18 -ի թ. 1689 Ա/շ հրամանը
ՀՀ դպրոցականների 2018-2019 ուսումնական տարվա առարկայական օլիմպիադաների /ՄԱԹԵՄԱՏԻԿԱ, ՔԻՄԻԱ, ԱՍՏՂԱԳԻՏՈՒԹՅՈՒՆ, ԿԵՆՍԱԲԱՆՈՒԹՅՈՒՆ, ԻՆՖՈՐՄԱՏԻԿԱ, ՖԻԶԻԿԱ, ԱՇԽԱՐՀԱԳՐՈՒԹՅՈՒՆ/ անցկացման ընթացակարգերը հաստատելու մասին։

Միջվարժարանային օլիմպիադա Գյումրու «Ֆոտոն» վարժարանում

2018 թ․ հոկտեմբերի 30-ին Գյումրու «Ֆոտոն» վարժարանում անցկացվեց Վ.Բարսեղյանի հիշատակին և երկրաշարժի 30-ամյա տարելիցին նվիրված հանրապետական հուշամրցույթ-օլիմպիադա մաթեմատիկա և ֆիզիկա առարկաներից։
Օլիմպիադային մասնակցեցին թվով 200 աշակերտներ (147-ը՝ մաթեմատիկայից և 53-ը՝ ֆիզիկայից) Երևանի Ա. Շահինյանի անվան ֆիզմաթ հատուկ դպրոցից /36/, ՀԱՊՀ-ի ավագ դպրոցից (Երևան) /10/, «Քվանտ» վարժարանից /16/, Գյումրու «Ֆոտոն» վարժարանից /71/, Գյումրու ակադեմիական վարժանանից /11/, ՀՊՏՀ-ի Գյումրու մասնաճյուղի ա/դ-ից /23/, Վանաձորի «Էվրիկա» վարժարանից /31/, Աշտարակի Վ.Պետրոսյանի անվան հիմնական դպրոցից /2/։
Ողջունելով մասնակիցներին և հյուրերին «Ֆոտոն» վարժարանի տնօրեն պարոն Մ.Մովսիսյանը բոլորին մաղթեց հաջողություն և նշեց, որ մաթեմատիկա և ֆիզիկա առարկաներից ամենաբարձր արդյունք գրանցած աշակերտներ դիպլոմների հետ կստանան անակնկալ մրցանակներ, որոնք կհանձնվեն Վ.Բարսեղյանի ընտանիքի և «Ֆոտոն» վարժարանի տնօրինության կողմից։
Ամփոփելով միջվարժարանային օլիմպիադայի արդյունքները հանձնաժողովի անդամները շնորհեցին 7 հատ I կարգի դիպլոմ, 12 հատ II կարգ դիպլոմ, 20 հատ III կարգ դիպլոմ և 44 հատ գովասանագիր։
Վ․Բարսեղյանի անվան մրցանակին մաթեմատիկա առարկայից արժանացավ Երևանի Ա.Շահինյանի անվան ֆիզմաթ հատուկ դպրոցի 9-րդ դասարանի աշակերտ Վահագն Հովհաննիսյանը, իսկ «Ֆոտոն» վարժարանի տնօրինության մրցանակին ֆիզիկա առարկայից արժանացել են 3 աշակերտներ՝ Երևանի Ա.Շահինյանի անվան ֆիզմաթ հատուկ դպրոցի աշակերտներ Արտաշես Գյոլեցյանն /10-րդ դասարան/ ու Հայկ Մուրադյանը /12-րդ դասարան/, և «Քվանտ» վարժարանի 10-րդ դասարանի աշակերտ Դավիթ Գյուլամիրյանը։

Տեսանյութ։ Միջվարժարանային հանրապետական օլիմպիադա բնագիտական առարկաներից։
Գյումրու «Ֆոտոն» վարժարանի տնօրինություն

Հայաստանի թիմերը մասնակցեցին Ռուսաստանի բաց օլիմպիադային

2018 թ․ հոկտեմբերի 28-ին Հայաստանի դպրոցական 11 թիմեր Երևանի Ա. Շահինյանի անվան ֆիզմաթ դպրոցում մասնակցեցին Ռուսաստանի թիմային բաց ծրագրավորման օլիմպիադայի ինտերնետ-ընտրական փուլին։ Լավագույն թիմերը իրավունք են ստանալու մասնակցել եզրափակիչ փուլին, որը տեղի է ունենալու դեկտեմբերի 8-9-ին։ Մրցույթի արդունքները կարելի է տեսնել այստեղ. http://neerc.ifmo.ru/school/archive/2018-2019/ru-olymp-team-internet-2018-standings.html
Մրցույթի արդյունքները հաշվի են առնվել նաև որպես Ֆիզմաթ դպրոցում կազմակերպված միջվարժարանային օլիմպիադայի արդյունքներ։
Հայաստանի թիմերի արդյունքները տես կից PDF ֆայլում։

Մ․Վ․Լոմոնոսովի անվան Մրցույթը Հայաստանում

Մ․Վ․Լոմոնոսովի անվան Մրցույթը ամենամյա բազմառարկայական մրցակցություն է մաթեմատիկա, մաթեմատիկական խաղեր, ֆիզիկա, աստղագիտություն և Երկրի մասին գիտություն, քիմիա, կենսաբանություն, պատմություն, ոճաբանություն և գրականություն առարկաներից։ Մրցույթի նպատակն է խրախուսել մասնակիցներին և հետաքրքրվողներին նպատակադրել ուսումնասիրելու հետաքրքիր նյութեր։
2018 թ․ սեպտեմբերի 30-ին Ռուսաստանի Դաշնությունում անցկացվեց հերթական 41-րդ Մրցույթի առաջին փուլը։ Մրցույթի կազմակերպիչների (համակարգող՝ Դմիտրի Զարուբին) հետ ձեռք բերված համագործակցության արդյունքում առաջին անգամ՝ նույն օրը, Հայաստանում /Ա․Շահինյանի անվան ֆիզմաթ հատուկ դպրոցում/ անցկացվեց Մ․Վ․Լոմոնոսովի անվան Մրցույթը։ Մրցույթին Հայաստանից մասնակցեցին 191 աշակերտներ /ԱՅԲ դպրոց – 4, «Հերացի» ա/դ – 27, ՔՎԱՆՏ վարժարան – 21, ՄՊՀ-ի ա/դ – 2, ՀԱՊՀ-ի ա/դ – 16, ՖԻԶՄԱԹ դպրոց – 57, ք․Գյումրու ՖՈՏՈՆ վարժարան – 31 և ք․Վանաձորի ԷՎՐԻԿԱ վարժարան - 33/: Առաջադրանքների կատարման համար տրված էր 5 ժամ ժամանակ, որի ընթացքում աշակերտները հնարավորություն ունեին միաժամանակ մասնակցելու մի քանի առարկաների մրցույթներում։ Արդյունքում, աշակերտները կատարեցին 234 աշխատանք /մաթեմատիկա – 109, ֆիզիկա – 64, քիմիա – 35, կենսաբանություն – 18, աստղագիտություն – 4, ոճաբանություն - 4/։ Մրցույթի առաջին փուլի հաղթողները հնարավորություն կունենան 2019թ․-ի մարտին մասնակցելու եզրափակիչ փուլին։
Մրցույթի կազմակերպման և անցկացման ժամանակ բազմակողմանի աջակցություն ցույց տվեցին և առաջադրանքների թարգմանությունը կատարելիս օգնեցին Հ․Նավասարդյանը /Ֆիզմաթ դպրոցի տնօրեն - մաթեմատիկա/, Մ․Հայրապետյանը /Ֆիզմաթ դպրոցի ֆիզիկայի ամբիոնի վարիչ - ֆիզիկա/, Գ․Ղուկասյան /կենսաբանություն առարկայի հանրապետական հանձնաժողովի նախագահ – կենսաբանություն/, Հ․Ադոնցը / ԵՊՀ քիմիայի ֆակուլտետի բակալավր 4-րդ կուրսի ուսանող - քիմիա/, Վ․Մամբրեյան /աստղագիտություն առարկայի Հայաստանի միջազգային թիմի մարզիչ - աստղագիտություն/։ Կամավորական աշխատանքներով մրցույթին մասնակցեցին Ա․Պապիկյանը /ԵՊՀ կիրառական մաթեմատիկայի ֆակուլտետի 4-րդ կուրս/ և Կ․Մինասյանը /ՀԱՊՀ ՏՀՏ ու էլեկտրոնիկայի ֆակուլտետի 4-րդ կուրս/։
Մրցույթի կազմակերեց և անցկացրեց Ֆիզմաթ դպրոցի ՏՏ կոորդինատոր – պատասխանատու Դ․Մինասյանը։
Մ․Վ․Լոմոնոսովի անվան Մրցույթի մասին առավել մանրամասն կարող եք ծանոթանալ հետևյալ հղումով՝ http://turlom.olimpiada.ru/ :

Ավարտվեց ՄԵԳԱՊՈԼԻՍՆԵՐԻ 3-րդ միջազգային օլիմպիադան

2018թ․ սեպտեմբերի 7-ին ավարտվեց ՄԵԳԱՊՈԼԻՍՆԵՐԻ /մեծ քաղաքների/ 3-րդ միջազգային օլիմպիադան, որին մասնակցեցին 33 քաղաքների (Ալմաթա, Աստանա, Բաքու, Բանյա-Լուկա, Բելգրադ, Բերլին, Բիշկեկ, Բոստոն, Բրատիսլավա, Բուդապեշտ, Հոնկոնգ, Ջակարտա, Դուշանբե, Դյուսելդորֆ, Երևան, Զագրեբ, Յերուսաղեմ, Ինսբրուկ, Լայպցիգ, Լիմա, Միլան, Մինսկ, Մոսկվա, Սանկտ-Պետերբուրգ, Սոֆիա, Ստամբուլ, Թել-Ավիվ, Հելսինկի, Շանհայ, Բոստոն, Մադրիդ, Ֆրանկֆուրտ, Ուլան-Բատոր) 257 աշակերտներ, այդ թվում նաև ք․Երևանի 8 հոգանոց թիմը (ՖԻԶՄԱԹ հատուկ դպրոց – 5 աշակերտ, ՀԵՐԱՑԻ ավագ դպրոց – 2 աշակերտ և ՔՎԱՆՏ վարժարան – 1 աշակերտ)։ Օլիմպիադան անցկացվեց չորս առարկաներից՝ մաթեմատիկա, ինֆորմատիկա, ֆիզիկա և քիմիա, յուրաքանչյուրից երկուական մասնակից։
Անցկացված բլից-տուրի արդյունքներով մեր թիմը գրավեց պատվավոր 12-րդ տեղը և արժանացավ մրցանակի։
Հիմնական փուլի թիմային արդյունքներով 7 քաղաքների (Բելգրադ, Սոֆիա, Մինսկ, Ստամբուլ, Բուդապեշտ, Ջակարտա, Զագրեբ) թիմերի հետ միասին Երևանի թիմը արժանացավ 2-րդ կարգի մրցանակի /
արծաթե գավաթ/։ 1-ին կարգի մրցանակի /ոսկե գավաթ/ արժանացան Մոսկվայի, Շանհայի, Սանկտ-Պետերբուրգի և Հոնկոնգի թիմերը, իսկ 3-րդ կարգի մրցանակ /բրոնզե գավաթ/՝ Լայպցիգ, Բաքու, Դուշանբե, Ինսբրուկ, Միլան, Աստանա, Ալմաթա, Բրատիսլավա, Բիշկեկ և Բանյա-Լուկա քաղաքների թիմերը։
Անհատական արդյունքներով մեր թիմի մասնակիցները արժանացան
3 արծաթե (Փանոսյան Լյովա - Ա․Շահինյանի անվան ֆիզմաթ հատուկ դպրոց (12-րդ դասարան) - մաթեմատիկա, Զոհրաբյան Դավիթ - Ա․Շահինյանի անվան ֆիզմաթ հատուկ դպրոց (12-րդ դասարան) – ֆիզիկա և Աղեկյան Մովսես - «Հերացի» ավագ դպրոց (12-րդ դասարան) - քիմիա) և 5 բրոնզե (Չթչյան Տիգրան - Ա․Շահինյանի անվան ֆիզմաթ հատուկ դպրոց (11-րդ դասարան) – մաթեմատիկա, Անդրեասյան Սամվել - Քվանտ վարժարան (11-րդ դասարան) – ինֆորմատիկա, Բեգլարյան Նարեկ - Ա․Շահինյանի անվան ֆիզմաթ հատուկ դպրոց (11-րդ դասարան) – ինֆորմատիկա, Գրիգորյան Քրիստինե - Ա․Շահինյանի անվան ֆիզմաթ հատուկ դպրոց (12-րդ դասարան) – ֆիզիկա, Մաթևոսյան Հովհաննես – «Հերացի» ավագ դպրոց (12-րդ դասարան) - քիմիա) մեդալների։
Օլիմպադան հագեցած էր նաև մշակութային մասով։ Մասնակիցները ծանոթացան Մոսկվայի տեսարժան վայրերի և զբոսնեցին շոգենավով։ Օլիմպիադայի անցկացման ողջ ընթացքը լուսաբանվեց Մոսկվայի քաղաքապետարանի կրթության և մշակույթի վարչությունների կողմից։
Թիմը ղեկավարեցին Դ․Մինասյանը /ՖԻԶՄԱԹ հատուկ դպրոց/ և Ս․Սիմոնյանը /ՀԵՐԱՑԻ ավագ դպրոց/։
Օլիմպիադայի մասնակիցները Երևան կժամանեն սեպտեմբերի 9-ին ժամը 3:30-ին։
Տես Մեգապոլիսների օլիմպիադայի կայքը՝ http://megapolis.educom.ru/ru :

Թվային տվյալներ դպրոցականների առարկայական օլիմպիադաներից

Հարգելի գործընկերներ,
Ավարտվեցին 2017-2018 ուսումնական տարվա դպրոցականների առարկայական օլիմպիադաները։
Ստորև ներկայացնում ենք օլիմպիադաների թվային տվյալները։
Ձեզ հետաքրքրող այլ հարցերի մասին կարող եք լրացուցիչ տեղեկանալ գրելով մեր էլ․փոստի հասցեին՝ info@olymp.am :
Հարգանքով՝
Օլիմպիադայի կազմկոմիտե

Pages